Rom 3 | BOJ | STEP | O was qu, niŋgi na e kamba endegsib merbqab kio, “O Pol, ni maronum, ‘Muluŋ aiqajqa kumbra di jejamu qa kumbra segi sai.’ Ni degsi maronum deqa Juda naŋgi muluŋ aieqnub dena naŋgi na tamo qudei buŋnjrqab e? Juda naŋgo muluŋ dena iŋgi bole kie brantqas?” O was qu, niŋgi na e kamba degsib merbqab kio?

Romans 3

Qotei a gaigai kumbra tiŋtiŋ na tamo naŋgi peginjreqnu

1 O was qu, niŋgi na e kamba endegsib merbqab kio, “O Pol, ni maronum, ‘Muluŋ aiqajqa kumbra di jejamu qa kumbra segi sai.’ Ni degsi maronum deqa Juda naŋgi muluŋ aieqnub dena naŋgi na tamo qudei buŋnjrqab e? Juda naŋgo muluŋ dena iŋgi bole kie brantqas?” O was qu, niŋgi na e kamba degsib merbqab kio? 2 Deqa e niŋgi kamba endegsi merŋgwai. Qotei a na iŋgi tulaŋ bole bole Juda naŋgi enjrej. Iŋgi bole bei agiende. A na Juda naŋgi aqa anjam taqatqajqa deqa wau enjrej. 3 Bole, Juda tamo qudei naŋgi Qotei aqa anjam di dauryosib naŋgo areqaloq di siŋgilatosaieqnub. Naŋgi urateqnub. Deqa iga endegsi marqom kio, “Qotei a gisaŋ tamo. A segi aqa anjam di dauryosaieqnu.” 4 O was qu, iga degsi marqasai. Iga endegsi marqom. Tamo kalil naŋgi gisaŋ tamo. Ariya Qotei a segi qujai gisaŋ tamo sai. A anjam bole segi gaigai mareqnu. Agi Qotei aqa anjam bei nami endegsib neŋgreŋyeb unu,

“O Qotei, ni gaigai kumbra tiŋtiŋ na e pegibeqnum.
Ariya tamo qudei naŋgi na ni pegimqa maribqa ni na olo naŋgi buŋnjrsim ni une saiqoji sqam.”
5 Deqa was qu, niŋgi na kamba olo e endegsib merbqab kio, “Iga kumbra uge yoqnqom dena Qotei aqa kumbra tiŋtiŋ olo brantoqnqas di iga kiersi marqom? Qotei a gago une qa minjiŋ oqim awai uge egwas di a kumbra uge yqo. Degsi marqom e?” O was qu, iga degsi marqasai. Qotei a gaigai kumbra tiŋtiŋ segi yeqnu. A kumbra tiŋtiŋ yqasai di a kiersim tamo uŋgasari naŋgo kumbra qa peginjrqas? Nuŋgo areqalo di mandam tamo naŋgo areqalo. 7 Ariya tamo bei a marqas, “E gisaŋ anjam maroqnitqa dena Qotei aqa anjam bole olo brantoqnqas. Yim aqa ñam tulaŋ goge oqoqnqas. Deqa a kiyaqa e une tamo qa merbsim awai uge ebqas?” O was qu, nuŋgo anjam di uge. 8 Tamo qudei naŋgi anjam uge deqaji endegsib mareqnub, “Uŋgum, iga kumbra uge uge yoqnqom. Yimqa gam dena kumbra bole brantoqnqas. Pol a anjam degsi palontosiq iga mergeqnu.” O was qu, tamo qudei naŋgi degsib iga yomuigosib mareqnub. Di gisaŋ. Naŋgo kumbra uge deqa Qotei na naŋgi awai ugedamu enjrqas.

Tamo bole bei sosai bolesai

9 Deqa iga kiersi marqom? Iga Juda tamo deqa iga na tamo qudei naŋgi buŋnjreqnum degsi marqom e? Iga degsi marqasai. Agi e niŋgi merŋgonum, iga Juda tamo ti Grik tamo naŋgi ti iga kalil une ti unum. Une na iga kalil kabutgejunu. 10 Agi Qotei aqa anjam bei nami endegsib neŋgreŋyeb unu,

“Tamo bole bei sosai bolesai.
Qujai bei a Qotei aqa kumbra tiŋtiŋ dauryosaieqnu.
Tamo dego bei sosai.
11 Tamo powo ti bei sosai.
Tamo qujai bei a Qotei itqa are qalosaieqnu. Tamo dego bei sosai.
12 Tamo kalil naŋgi gam bole uratekritonub.
Naŋgi kalil tamo uge.
Qujai bei na kumbra bole dauryosaieqnu. Sai bolesai.
13 Naŋgi kalil anjam uge mareqnub.
Tamo moio qaji sub meaŋesonaq tamo naŋgo qusa sub miligiq di qusaeqnu
dego kere tamo kalil naŋgo medabu na anjam tulaŋ uge uge mareqnub.
Naŋgi gisaŋ anjam koba mareleŋeqnub.
Amal uge na tamo uñinjreqnub dego kere tamo kalil naŋgo medabu na tamo uŋgasari naŋgi ugeugeinjreqnub.
14 Gaigai naŋgo medabu na tamo naŋgi ugeugeinjroqnsib gulube enjreqnub.
15 Naŋgi bati gaigai tamo ñumsib moiotnjrqajqa are qaloqnsib deqa urur ti gileqnub.
16 Naŋgi na tamo uŋgasari naŋgi ugeugeinjrqajqa are qaloqnsib deqa gulube koba enjreqnub.
17 Naŋgi tamo uŋgasari naŋgi koba na lawo na sqajqa kumbra qaliesai.
18 Naŋgi Qotei yala ulaiyosaieqnub.”
O was qu, Qotei aqa anjam nami degsib neŋgreŋyeb unu.

19 Iga qalie, Moses a dal anjam neŋgreŋyej di tamo naŋgi dal anjam aqa sorgomq di unub qaji naŋgi qa osiq deqa neŋgreŋyej. Deqa tamo bei a endegsi marqa keresai, “E tamo bole. E une saiqoji.” A degsi marqa keresai. Iga tamo uŋgasari kalil sawa sawa kalilq di unum qaji iga Qotei aqa ŋamgalaq di une ti unum. 20 Deqa tamo bei a dal anjam dauryosim dena a Qotei aqa ŋamgalaq di tamo bole une saiqoji sqajqa tamo dego bei sosai. Dal anjam na iga gago une osorgeqnu. Di segi.

Tamo uŋgasari Yesus Kristus qa naŋgo areqalo siŋgilateb qaji naŋgi segi tamo bole une saiqoji sqab

21 O was qu, iga tamo bole une saiqoji sqajqa gam bei unu. Iga dal anjam dauryoqnqom gam dena sai. Qotei na gam bei babtosiqa iga osorgej. Nami Moses a gam deqa marsiq dal anjamq di neŋgreŋyej unu. Qotei aqa medabu o qaji tamo kalil naŋgi dego gam deqa marsib anjam neŋgreŋyeb. 22 Gam agiende. Tamo uŋgasari Yesus Kristus qa naŋgo areqalo siŋgilateqnub qaji naŋgi segi Qotei na tamo bole une saiqoji qa minjreqnu. Gam di segi. Gam bei saiqoji. 23 Iga kalil une ateqnum deqa iga laŋ qureq oqsim dia Qotei ombla sqa keresai. 24 Ariya Qotei a iga qa are boleiyosiq Kristus Yesus qariŋyonaqa a na iga eleŋej gam dena Qotei na iga tamo bole une saiqoji qa mergeqnu. Di gago wau na sai. Qotei a Kristus Yesus aqa wau na iga laŋa eleŋej awai saiqoji. 25 Agi Qotei a endegsi are qalej. A na Yesus qariŋyim a bosim moiim aqa leŋ aisim tamo uŋgasari kalil a qa naŋgo areqalo siŋgilateqnub qaji naŋgo une taqal waiysim aqa minjiŋ kobotqas. Kumbra dena a na iga tamo bole une saiqoji qa mergej. Aqa kumbra di a na iga osorgej. Nami Qotei a tamo naŋgi are bulyqajqa deqa marsiq naŋgi qa tariŋoqnsiqa naŋgo une qa urur kambatnjrosaioqnej. 26 Ariya bini bati endi Qotei na iga endegsi osorgeqnu, a gaigai kumbra bole tiŋtiŋ segi yeqnu. Deqa iga endegsi qalieonum, Qotei a na tamo uŋgasari Yesus qa naŋgo areqalo siŋgilateqnub qaji naŋgi tamo bole une saiqoji qa minjreqnu di a kumbra bole tiŋtiŋ yeqnu.

27 Deqa tamo yai na aqa segi ñam soqtqa kere? Tamo dego bei sosai. Iga gago segi ñam soqtqajqa kumbra di torei koboej. Dal anjam dauryqajqa gam dena kumbra di kobotosai. Iga Yesus qa gago areqalo siŋgilatqom gam dena qujai gago segi ñam soqtqajqa kumbra di kobotej. 28 Di kiyaqa? Bini iga qalieonum, iga Yesus qa gago areqalo siŋgilatqom gam dena qujai iga Qotei aqa ŋamgalaq di tamo bole une saiqoji sqom. Iga dal anjam dauryqom gam dena sai.

29 Deqa iga kiersi marqom? Qotei a Juda naŋgo segi Qotei e? A sawa bei bei qaji tamo naŋgo Qotei sai e? Sai. A sawa bei bei qaji tamo naŋgo Qotei dego. 30 Qotei a segi qujai Qotei bole. Deqa muluŋ aio qaji tamo ti muluŋ aiosaieqnub qaji tamo naŋgi ti Yesus qa naŋgo areqalo siŋgilatqab di Qotei a naŋgo areqalo di unsim naŋgi tamo bole une saiqoji qa minjrqas. 31 Iga maronum, iga Yesus qa gago areqalo siŋgilatqajqa kumbra di tulaŋ boledamu. Ariya iga degsi maronum dena iga olo dal anjam taqal ateqnum e? Sai. Iga Qotei aqa dal anjam olo siŋgilateqnum.